WIr Rector, und Rat, gemainer hohenschu[o]l zu[o] Ingolstat, Embieten allen und yeden was, wesen, wirden und Standts die sein, unsern freündlichen gru[o]ß zu[o]vor, fügen denselben hiemit zu[o]vernemmen, als wir des nechstverschienen halben jars mit gunst un[d] verwilligung, des Durchleüchtigen Hochgebornen Fürsten und Herrn, Herrn Wilhelmen Pfaltzgraven bey Rhein, Hertzogen in Obern und Nidern Bayrn [et]c. unsers genedigen Herrn, der sterbenden läuff halb, so sich bey uns erhaben, All unnd yede Lectiones, bey gemainer unser hohenschu[o]l auffgehebt, und den Doctorn (zu[o]vorauß der Juristen facultet) Magistris, und andern Lerenden und studierenden personen (sovil wir der beyeinander behalten haben mögen) an ain sicher ort, nemlich gen Kelhaim, sich zu[o]enthalten verordnet haben, unnd die andern von einander an die ort, dahin sich ain yeder zu[o]thu[o]n fürgenommen ziehen haben lassen, Dieweil nun von den genaden Gott des Allmechtigen die Sterbenden läuff gentzlich auffgehört, haben, wir vor ainerzeit, auff besundern bevelch hochgenants unsers genedigen Herrn des Landsfürsten, die gemelten Doctores, Magistri, und ander Lesendt und Studierendt personen widerumb berüffen lassen, darzu[o] verordnet das in hohen, und freyen künsten, on bezalung ainichs gelts soll vleissig gelert unnd gelesen werden, Solchs wolten wir ainem jeden so sich zu[o] uns thu[o]n, oder jemandt zu[o]schicken vorhet, nit verhalten., Geben zu[o] Ingolstat under unser Universitet hiefürgedruckten Secret Insigel, am achtzehenden tag des monats Maii Nach Christi unsers Herren geburt Fünffzehenhundert und im sechs und viertzigsten jar., [S.l.], [1546]
[BSB-Einblatt-ID: BSBEinblB300001652] |  |  |
Bildähnlichkeitssuche 
